Turistanan Yama Bon Bini Ku Bala Na Aeropuerto Hato

Mi tabata rabia ku antianonan na Hulanda ku ta tra mal propaganda pa Korsou, pero awoki mi ta pensa ku nan ta bon mes. Miho nos baha tur billboard di dushi Korsou (si tin), paso eii… Niun hende no ta kere e kos ei mas. Ayeranochi tabatin un tiroteo a tuma luga na nos Aeropuerto internashonal Hato. Normalmente ora mi tende un tiroteo na Korsou, pa tristu ku ta, mi no ta ni worry. Pero e wega di bashament’i bala na aeropuerto si a kansa mes mes. No tin mas mal propaganda ku esaki!!

Korsou a bira notisia internashonal, lamentablemente no ta pa nada bon. Dos hende a muri i hopi mas tabata herida. Asta turistanan ku tabata na Hato a haña bala, hende ku no tin nada di haber ku e bagamunderia aki. Forsa na famia di e defuntunan.

Awo ban wak kuantu ta dura prome ku polis kue esun ku a hasi e ko’i loko aki.. Anto si nan hañ’e mes, kuantu aña e ta haña.

Ta aki un luna nos tin Curacao North Sea Jazz Festival ku lo ta un bon propaganda pa Korsou un biaha mas. Ban wak kuantu hende lo bin. Ami lo baha na Mega Pier numa, mas serka.