Tin Bia Nos Por Ta Muchu Kreativo Tambe. Òfnò Prudential?

Masha dia, mihó bisá, masha aña, mi no a skibi algu akibanda. Pero den e periodo di Corona aki, mi ta na kas, ku hopi tempu liber. Esei a pone ku mi ta mas aktivo riba retnan sosial manera Facebook i Instagram, ta wak kiko ta pasando den nos komunidat.

Dor di esaki mi a ripara ku yen hende ta purba ta kreativo (komprondibel) den e periodo aki, Tin kaminda ku kreatividat ta krusa grèns i ta yega na punto ku bo ta motivando hende pa hasi kosnan kontra di regla/lei.

Nos Gobièrnu a ordena pa tur hende keda kas, te proksimo aviso. Kada lèter di outo ta haña dos chèns pa siman pa ta riba kaya, pa hasi kosnan esensial (bai supermerkado, botika èts.)

Pero ta parse ku Prudential a haña un manera kreativo pa bypass e regla aki. E kompania aki, pa medio di un propaganda, ta invitando hende ku un pa hür un outo serka nan ku un lèter, diferente for di nan plachi number, pa asin’ei e hürdó por sali kas mas ku e bianan designa pa su plachi number di outo.

Mi ta kompronde, tur negoshi ku no ta wòrdu konsidera esensial ta sufriendo den e tempunan aki. Nos tur ke pa tur kos por kumisa drai bèk. Doñonan di negoshi lo ke kumpli ku nan nesesidatnan finansiero. Pero pa pidi hende falta ku reglanan vigente, no ta e manera si nò.

Porta ta mi idea, pero e kos aki no por wòrdu konsidera asta ilegal/kontra lei?