Ladron Ta Pega Outo Na Kandela, Ta Kos Di Hende Bobo

Ami ta kompronde ku komo un ladron, bo mester di transportashon pa yega bo trabou. Mayoria biaha ora e trahado durunan aki subi warda ta oranan lat di anochi, oranan ku konvoi no ta kore mas i busnan no ta kore regularmente. No ta nada straño anto ku nan sa fia outo di hende pa bai trabou bin bèk.

E trabou ei mi ta imagina mi ta basta duru, paso bo mester ta basta lihe pa e doño no yega haña bo ta bai ku su outo. Kemen e gainan aki ta funshona bou di hopi strès, paso nan tin ku yega trabou na tempu i traha lihe tambe. Pero awo ku bo yega trabou, ba kaba di laad i los tur kos den bo outo. Dikon bo ta bai kima e outo? Bo no tin ku bai trabou mañan? No ta mas trabou bo ta kreando pa bo mes? Paso mañan ora bo bai traha bo tin ku bolbe fia un otro outo atrobe. E gainan aki tin ku siña traha un poko mas efisiente.